Со предавањето „Еколошки иднини“ на архитектот Даниел Кунерт вечерва во 19 часот на Архитектонскиот факултет во Скопје ќе почне 20. издание на АКТО фестивалот за современи уметности. Предавање е најава за официјалната тридневна програма на фестивалот што ќе се реализира во киното на Железничката зграда во Скопје од утре до 5 октомври.
Кунерт е дел од „Арх плус“ (ARCH+), берлинското списание за архитектура и уметност основано во 1967 година кое критички ги разгледува општествените аспирации на изградената средина во кварталните изданија. „Еколошки иднини“ е заеднички проект на „Арх плус“ и Гете-институт насочен кон еколошките и социјалните предизвици на нашето време.
– Проектот обединува урбанисти, уметници, културни чинители, жители, локални заедници, Гете-институти и нивните партнери за да ги истражуваат локалните политики и потреби, развивајќи идеи и практики што придонесуваат за социо-еколошка иднина. Сознанијата од овие соработки се документираат во фонд на алатки кој постојано се дополнува, а служи како архива на знаење и практичен ресурс за примена и на други локации. Кунерт ќе го претстави проектот и „Арх плус“, залагајќи се за важноста на практики како што е „Градот како сцена“ – велат организаторите.
Годинава на фестивалот ќе се случуваат повеќе изложби, проекции, разговори и предавања, работилници и музички настани… Целата програма ќе се одржува во новоотворената Лабораторија за просторно перформативни практики „Градот како сцена“ лоцирана во киното на Железничката зграда во центарот на Скопје. Гости на фестивалот се Зорица Милисавлевиќ-Милојковиќ (Урбани оази, Белград), Борис Бакал (Фрлачи на сенки, Загреб), Давид Нил Морси и Кристин Лаз (Floating University, Берлин), ОПА (ЗаУМ архива), Славчо Димитров (Викенд на гордоста, Скопје), Кристина Леловац (Прво па женско, Скопје), Димитар Самарџиев (Бостание – општествена градина, Скопје), Виолета Качакова и Филип Тасевски (Земјотрес – фестивал на независна музика), Пијан Славеј, групите „Сиз“, „Трето колено“ и други.
Фестивалот го организира Факултет за работи што не се учат – ФРУ. АКТО 20 е фокусиран на славење на слободната мисла и правото на користење на јавните простори, правото на создавање на мултидисциплинарни уметнички активности, вклучувајќи различни заедници, уметници, експерти и граѓани. Но, и на соработката и поддршката на млади автори и студенти и активно вложување во едукативни процеси.
20. издание на АКТО е поддржан од Гете Институт Скопје, „Арх плус“, Министерство за култура и туризам, а во организацијата се вклучени многу партнери и соработници.
